• Cynhelir 96 o Eisteddfodau Cylch ac 16 o Eisteddfodau Rhanbarth trwy Gymru er mwyn dewis y 15,000 o fuddugwyr i gystadlu mewn dros 460 o gystadlaethau a gynhelir yn Eisteddfod Genedlaethol yr Urdd.
• Mae dros 45,000 o aelodau'r Urdd yn cymryd rhan yn yr Eisteddfodau Cylch a Rhanbarth cyn mynd ymlaen i'r Eisteddfod Genedlaethol.

• Mae Eisteddfod Genedlaethol Urdd Gobaith Cymru felly yn cael ei chydnabod fel gwyl ieuenctid fwyaf Ewrop.
• Mae dros 100,000 yn ymweld â'r wyl deithiol hon sy'n cael ei chynnal ddiwedd mis Mai am chwe niwrnod yn y De a'r Gogledd bob yn ail.
• Mae'r dros 460 o'r cystadlaethau sydd ar gael yn cynnwys pob math o bynciau e.e. canu, dawnsio (disgo, gwerin, creadigol), llefaru, offerynnol, llenyddol, celf a chrefft, gymnasteg, gwyddoniaeth a.y.b

.

• Mae cystadlaethau arbennig i ddysgwyr a chan mai Cymraeg yw iaith swyddogol yr wyl mae offer cyfieithu ar y pryd ar gael i'r di-Gymraeg.

• Mae dros 150 o stondinau yn gwerthu pob math o nwyddau a gwasanaethau ar faes y Brifwyl. Mae Pabell Celf, Dylunio a Thechnoleg, Pabell Gwyddoniaeth, Pabell Roc, Pabell y Dysgwyr, Meithrinfa, Ffair, beiciau modur, ymysg rhai o'r atyniadau sydd ar gael ar y maes hefyd.

• Mae gweithgareddau'r Eisteddfod yn parhau gyda'r nos hefyd. Bydd plant o ysgolion lleol wedi bod yn brysur yn ymarfer ers misoedd ar gyfer y Sioe Gynradd a lwyfennir fin nos yn y Pafiliwn ar faes yr Eisteddfod. Bydd pobl ifanc o'r sector uwchradd hefyd wedi bod yn brysur yn ymarfer ar gyfer sioeau eraill a lwyfennir mewn canolfannau o fewn y dalgylch. Ar nosweithiau eraill yn y Pafiliwn gellir mwynhau gwledd o gystadlaethau amrywiol megis y gân actol a'r cerddorfeydd yn ogystal â chyngherddau a fydd yn gyfle i ddoniau lleol ddisgleirio.

• Eisteddfod Genedlaethol yr Urdd - y fwyaf yn Ewrop, yr unig un o'i bath yn y byd!