Urdd Gobaith Cymru
   Swyddfa’r Urdd
     Ffordd Llanbadarn
       Aberystwyth
         Ceredigion
          SY23 1EY

         Ffôn 01970 613110
      Ffacs 01970 626120
Ar y We:www.urdd.org

EISTEDDFOD GENEDLAETHOL URDD GOBAITH CYMRU

YNYS MÔN, 2004

Datganiad i'r Wasg

Y FEDAL DDRAMA

Enillydd:  MEINIR LLOYD JONES AELOD UNIGOL, BRO ALED, CONWY

Mae Meinir Lloyd Jones, enillydd y Fedal Ddrama yn Eisteddfod Genedlaethol Urdd Gobaith Cymru Ynys Môn 2004 yn athrawes yn Ysgol Gynradd Llannefydd ers dwy flynedd.  Yn wreiddiol o Fetws yn Rhos, cafodd ei haddysg yn Ysgol Gynradd Betws yn Rhos ac yna yn Ysgol Uwchradd Y Creuddyn.  Astudiodd Gymraeg a Llên y Cyfryngau ym Mhrifysgol Cymru Bangor, gan raddio gyda gradd ddosbarth cyntaf yn y flwyddyn 2001.  Roedd un o'r beirniaid, William R Roberts, yn diwtor arni yno.

Ymysg ei diddordebau mae Meinir yn rhestru cerdded, nofio, beicio a dosbarthiadau byms a tyms!  Mae hi hefyd yn hoffi Eisteddfota, gan ganu, llefaru a chystadlu mewn partïon yn lleol a chenedlaethol.  Mwynhaodd wyliau yn Prague a Vienna dros y Pasg, gan weld ei hopera gyntaf yn Vienna! 

Mae Meinir yn mwynhau dramâu gan ddramodwyr megis Meic Povey a Lillian Hellman. Mae hi hefyd yn cael blas ar fynd i'r theatr i wylio cwmnïau lleol a phroffesiynol yn cyflwyno dramâu. Bu ar gwrs sgriptio yng nghanolfan T Newydd, hefo Meic Povey a Dewi Williams - beirniad arall heddiw.  

Yn eu beirniadaeth meddai'r beirniaid:

Ar yr olwg gyntaf drama yw hon am dyndra rhwng tri phlentyn – dwy ferch a bachgen – yn chwarae mewn parc. Ond buan y sylweddolir fod hyn yn digwydd yn y flwyddyn 2008 pan yw’r wlad hon bellach dan fygythiad terfysgol. Adlewyrchir hyn yn agweddau milain y plant at ei gilydd; mae’r chwarae plant ymddangosiadol diniwed yn troi’n fygythiadau a chyhuddiadau sinistr; mae fel petai’r plant wedi’u llygru gan amgylchiadau y tu hwnt i’w rheolaeth. Ceir ymdrech dda i greu cymeriadau o gig a gwaed, rhai y gallwn uniaethu â hwy yn eu hing a’u hapusrwydd. Mae gan yr awdur glust dda am ddeialog a  rhythmau iaith ac mae’r gwaith wedi ei bupro â fflachiadau hyfryd o hiwmor a dywediadau bachog sy’n lliwio’r  ddrama. Mae gan y dramodydd hwn  hefyd rywbeth o bwys i’w ddweud wrthym.

Meddai Meinir:

Fe'm hysgogwyd i ysgrifennu'r ddrama hon yn dilyn helyntion diweddar Afghanistan ac Irac. Mae'r ddrama wedi ei gosod yn y dyfodol agos ac yn edrych ar effaith y rhyfel ar blant ac ar gymdeithas. Mae'r cymeriadau yn ddrychau i rai o'r gwledydd sydd ynghlwm wrth y rhyfel.

Catrin Dafydd o Aelwyd Pantycelyn, Aberystwyth, Ceredigion ddaeth yn ail eleni, gyda Bethan Williams o Aelwyd Bethel, Arfon, Eryri yn drydydd. 

Diwedd

Am fwy o fanylion cysylltwch â Siân Eleri Davies ar 07811 269929 neu Eurgain Haf ar 07770 955668

1 Mehefin 2004