Na, mae’r Mônamental wedi hen fynd a’r Mônstârs di’n enw ni bellach. Enw llawer gwell da chi’m yn meddwl?

Erbyn i chi ddarllen hwn mi fydd haf prysur iawn i’r Pwyllgor Ieuenctid wedi hen fynd a chyfnod prysurach o’n blaenau wrth barhau i hyrwyddo’r Eisteddfod.

Yn ystod rhan olaf tymor yr haf cawsom ddisgos llewyrchus iawn yng nghylchoedd Cefni ac Alaw/Cybi. Daeth nifer fawr iawn o blant ynghyd gyda’i ffrindiau wedi gwisgo’n tu hwnt o ffasiynol ac yn barod i ddawnsio. Cafwyd andros o hwyl gyda’r DJ Dafydd John. Gwnaethpwyd elw hynod o daclus ar gyfer ein targed. Cylchoedd Eilian a Menai peidiwch chi a diagaloni nad ydych chi wedi cael disgos eto – mi fyddant yn cael eu trefnu yn o fuan.

Ar Awst 13eg a 14eg roedd gan yr Urdd stondin yn Sioe Amaethyddol Môn yn gwerthu nwyddau a bu rhai o aelodau Mônstârs yn weithgar tu hwnt yn ystod y ddau ddiwrnod yn peintio wynebau, rhoi cymorth gyda’r wal ddringo, rhannu sticeri a cherdded o gwmpas y sioe gyda Mr Urdd.

Ar nos Fercher y sioe cafwyd gig hynod o lewyrchus ( FFANTASTIG i fod yn onest) yng nghwmni Bryn Fôn a Bysedd Melys. Gwerthwyd pob un tocyn o fewn dim ac roedd ysgubor Tafarn y Rhos yn orlawn a phawb yn mwynhau eu hunain. Diolch o galon i bawb o’r pwyllgor a fu o gymorth yn hyrwyddo’r noson ac yn stiwardio.

Yn fuan iawn yn yr wythnosau nesaf mae dau aelod o’r pwyllgor wedi bod yn ddigon dewr ( neu gwirion) i gytuno gwneud ‘absail’ i lawr Twr Marcwis. Y ddau wallgofyn fydd Arwel ac Arwyn ac os dwi wedi clywed yn iawn bydd y ddau mewn gwisg ffansi! Pob lwc i’r ddau ac os oes gennych ddiddordeb eu noddi rhowch alwad i mi. Rydym yn gobeithio casglu llawer o arian felly byddwch yn hael.

Bellach hefyd rydym wedi cael ein crysau polo ac ew rydym yn edrych yn smart.

Wel, dyna ni y tro, cofiwch os oes gennych ddiddordeb mewn ymuno a ni rhowch alwad i mi.

Hwyl am y tro a parhewch i’n cefnogi.

Eirian Stephen Williams, Cadeirydd. 01407 720 077